“Il sogno di Giulia” – Dae su dolore de sa morte naschet sa vida pro tantas famìllias

Comente si podet atzetare sa morte de una fìgia de 10 annos? Comente lu podet aguantare su coro de una mama? Trasformende·lu e faghende·nde nàschere unu bene pro sos fìgios angenos.

Est su chi at fatu Eleonora Galia de Bosa, a pustis de sa morte de sa fìgia Giulia pro unu tumore a su cherbeddu in su 2018.

Giulia, pagu tempus in antis de mòrrere, aiat pedidu a sa mama de dare totu sos giogos suos “a sos pitzinnos prus isfortunados de me, a sos chi non tenent nudda”. E est su chi sa mama at fatu faghende nàschere s’assòtziu “Il sogno di Giulia”, chi retzit e regalat giogos, bestires, libros e totu su chi podent bisongiare a una famìllia chi est pesende pitzinnos minores.

Sa sede de s’assòtziu est in Casteddu (carrera Baronia n° 13) e est aberta mèrcuris e chenàbura dae sas 4 a sas 7 de sero (h 16-19).

Sas famìllias chi s’agatant in situatziones de dificultade podent andare e retzire totu su chi lis bisòngiat. In s’assòtziu b’agatant finas tantos professionistas (nutritzionistas, psicòlogas, avocados, mastros, dentistas, ginecòlogas etc.) chi prestant servìtziu sena si fàghere pagare nudda.

Chie si cheret pònnere a disponimentu donende giogos, bestires, libros o sa professionalidade sua podet cuntatare s’assòtziu in carrera Baronia o iscrìere unu messàgiu in sa pàgina Facebook “Il sogno di Giulia Zedda“.

Si calicunu cheret dare un’agiudu econòmicu pro sas ispesas de su locale podet fàghere unu bonìficu a su contu currente bancàriu “Banco di Sardegna – Agenzia di Cagliari – Filiale 5 – Pirri” (IBAN IT14J0101504808000070693843) o dare su 5X1000 a “ilsognodigiuliazeddaodv” (Codice Fiscale 92251870926).

Si podet agiuare finas comporende sas mallieddas de s’assòtziu, sos gadget dedicados a Giulia o su libru “Volevo vivere a colori” iscritu dae sa mama Eleonora Galia.

(GF.P.)