Su “giru de Sardigna” imbatet a Bosa

Setighentos chilòmetros in s’abba, in duos meses, pro regòllere dinari pro s’assòtziu “Amelia Sorrentino Odv”. Est comintzada a primos de trìulas e s’at a concruire a fine de austu s’impresa de Corrado Sorrentino, nadadore, campione pro tantas bortas, una vida passada in s’abba, in antis comente nadadore, a pustis comente istrutore. Como, dae s’annu passadu, at comintzadu un’impresa noa, est a nàrrere su giru de sa Sardigna nadende. At a èssere semper iscortadu dae unu gommone e suportadu dae sa Guàrdia Costera. Sa regorta de su dinari est destinada a sa fundatzione Amelia ODV (in ammentu de sa fìgia morta in su 2018, a sete annos, pro neghe de una maladia rara) e tenet s’iscopu de comporare aparechiaduras pro su repartu de oncoematologia pediàtrica de s’ispidale Microtzitèmicu de Casteddu, pro permìtere a sos dotores de sìghere a distàntzia sos pitzinnos ricoverados. Sa proposta est pràghida meda a s’amministratzione comunale de Bosa chi at detzisu de patrotzinare s’initziativa. In fatis su babbu nadadore est arribadu, iscortadu dae una imbarcatzione de apògiu cun personale mèdicu, su 9 de austu a Bosa Marina, a faca a sa Turre Aragonese, e a l’isetare b’aiat pitzinnos meda chi faghent parte de assòtzios isportivos e de su tzentru de istiu de Abba Mala.

(M.G.S.)