Hotel e retzas WiFi: sos perìgulos e comente si difèndere

In custu tempus de fèrias sa gente andat a istare a logu de fora e a su sòlitu si cullegat a Internet impreende sa retza WiFi de sos albergos chi la òspitant.

Podet duncas capitare chi, mancari b’apat mesuras de seguresa, si pòngiant in perìgulu sos datos personales e sa privacy ca bortas meda a sos albergos los leant de mira sos piratas informàticos, essende logos chi bi tràficat gente meda.

Sas cosas chi càpitant de prus sunt custas:

– evil twin: sos malintentzionados faghent una retza cun su matessi nùmene de s’albergu. Chie si bi cullegat, sena l’ischire nche faghet intrare sos piratas a sos datos suos;

– man-in-the-middle: sos hacker si apròpiant a sa cua de sos datos mandados o retzidos dae su cliente, sena chi issu si nd’abbiget;

– packet sniffing: su pirata informàticu registrat sos “pachetos” de datos mandados dae s’utente a su router WiFi “abertu”;

– router haking: sigomente su router bortas meda est postu in logos chi totus bi podent imbàtere (pro esempru in s’intrada de s’albergu o in sos passaditzos), lu podent manipulare e isfrutare pro nche furare informatziones de onni tipu, finas sas de sos pagamentos.

In prus de totu custas cosas, b’at perìgulu mannu finas pro sa privacy, ca chie amministrat sa retza WiFi podet bìere sos datos mandados e retzidos, si non b’at critografia.

Comente si podent difèndere sos datos e sa privacy?

Su mètodu prus fàtzile e profetosu est a impreare una VPN (Virtual Private Network), una rete privada virtuale chi assegurat privacy, anonimadu e seguresa pro mesu de unu canale de comunicatzione riservadu creadu subra de un’infrastrutura de retza pùblica.

Un’àtera manera est de impreare su smartphone comente puntu de intrada WiFi, istende atentos a non nche colare su livellu màssimu de tràficu-datos chi si tenet.

(GF.P.)