Su Museu “Casa Deriu” de Tresnuraghes

    Sa domo “Casa Deriu”, inaugurada in su mese de freàrgiu 2017 in Tresnuraghes, chi òspitat su museu, si narat gasi dae su nùmene de s’ùrtimu propietàriu suo. Est istada fata a sa fine de su 1600 e aparteniat  a una famìllia de notàrios, avocados, propietàrios de terrinos, sa matessi famìllia chi fiat propietària de sa domo chi como est sa sede de su museu “Casa Deriu” de Bosa. Su Museu “Casa Deriu” de Tresnuraghes rapresentat unu casu ùnicu in su panorama museale sardu. Su percursu de bìsita est unu biàgiu in su tempus, partende dae s’istòria de una famìllia de sa burghesia sarda de sos sèculos XVIII-XIX si passat a tratare temas chi pertocant s’istòria de su giornalismu e de sos giornales sardos, faeddende de moda, de biàgios, de libros de importu. S’istrutura si isvilupat in tres bias diversas ma integradas a pare: su museu, su tzentru de documentatzione de giornalismu e periòdicos in Sardigna in sos sèculos XIX e XX, e su tzentru de documentatzione e de initziativa pro sa defensa de sos diritos umanos. In sa domo b’at parte de sos arredos originales lassados dae sos meres antigos, una regorta manna de libros giurìdicos, teològicos e àteros, publicados tra sa fine de su 1600 e sos primos annos de su 1900. Contat giai 1000 volùmenes e unu fundu documentàriu. Sa colletzione esposta est de giai 110 testadas diversas e rapresentat una de sas regortas prus ricas de periòdicos de Provìntzia de su sèculu XIX. In su pranu-terra b’at unu logu dedicadu a sos temas chi pertocant sas atividades de su tzentru, chi esàminat sos temas chi pertocant s’emigratzione  e sa ditadura Argentina tra su 1976 e su 1983. Intre sos desaparecidos si contant fintzas duas persones de Tresnuraghes, Martino Mastinu e Mario Bonarino Marras, fatos isparire in Argentina pro sas ideas polìticas issoro. Su museu dat puru a sos bisitadores propostas didàticas diversas in base a sas esigèntzias de sos utentes. Dae sa bìsita guidada a su museu a su situ archeològicu de Nuraghe Nani a esperièntzias de bìsita dedicadas fintzas a sos bisitadores prus dèbiles.

Indirìtziu: TRESNURAGHES (OR) Carrera San Giorgio – Telèfono: +39 0785 35509 – e-mail: info@museotresnuraghes.it

http://www.museotresnuraghes.it/

(M.G.S.)