In s’ispidale de Ilartzi est torrada a partire s’atividade de “chirurgia de una die” (day surgery) – Prus interventos finas in Bosa

In s’ispidale “Delogu” de Ilartzi dae mèrcuris 12 de santugaine est torrada a comintzare s’atividade de day surgery, est a nàrrere sa modalidade de fàghere interventos chirùrgicos o àteras terapias faghende unu ricòveru de 24 oras ebbia.

A s’ispidale “Mastino” de Bosa, chi at torradu a comintzare custu tipu de interventos dae su mese de maju, bi l’ant a potentziare.

“Custu progetu de torrare a comintzare cun su day surgery in Ilartzi e de crèschere su de Pianalza si podet fàghere ca amus assuntu cun cuntratu de lìberos professionistas tres dotores noos, chi ant a agiuare su personale de s’Unidade operativa de Anestesia e de Rianimatzione” ispiegat su diretore generale de sa Asl de Aristanis, Angelo Serusi.

Pro cantu atenet a s’ispidale “Delogu”, at a andare a in antis sa chirurgia de ambulatòriu, torrada a aviare in sos meses passados e operativa una borta a sa chida. A custa si b’at a agiunghere su day surgery chirùrgicu e urològicu, chi prevident interventos o terapias fatas cun anestesia in una die, sena bisòngiu de osservatzione a de note.

A primu sas duas atividades de “chirurgia de una die” (sa chirùrgica e s’urològica) s’ant a fàghere a chidas alternadas, ma dae sa metade de su mese de santandria s’ant a fàghere onni chida. S’ant a pòdere finas programmare in duas dies (non prus in una) sos esàmenes radiològicos cun mezu de cuntrastu, addopiende sa disponibilidade de s’Unidade operativa de Radiologia pro custu tipu de prestatziones.

Su potentziamentu de sas atividades chirùrgicas e anestesiològicas est in programma finas in Bosa, in ue finas a como si faghent duas sessiones operatòrias de day surgery a sa chida e una de servìtziu ortopèdicu programmadu, sena die fissa. In prus de s’atividade chirùrgica, s’anestesista assegurat finas s’ambulatòriu de terapia de su dolore e de curas calmantes, chi in sos ùrtimos tempos sunt chircadas meda.

(GF.P.)