Bosa: Progetos culturales in limba sarda

S’Ufìtziu de sa Limba Sarda de Pianalza-Montiferru otzidentale, cun comune capu filera Bosa e cun su coordinamentu de TERRA DE PUNT de Salvatore Cubeddu, in s’àmbitu de su progetu POETENDE, CANTENDE E… CHISTIONENDE, at ativadu  progetos culturales de promotzione linguìstica in limba sarda, finalizados a fàghere a connòschere a sos giòvanos sas sabidorias traditzionales, dende·lis sa possibilida de èssere protagonistas de sa vida de su territòriu issoro, imparende sa limba sarda e connoschende atividades e sabidorias antigas. S’at a fàghere unu laboratòriu de mùsica e laboratòrios de atividades antigas (làuru de Bosa, giogos antigos de linna), cun sa ghia de espertos de custos setores e s’ant a fàghere totu in sardu. Sas atividades culturales sunt pro totu sos comunes chi ant aderidu a su progetu e duncas ant a èssere itinerantes, in sos locales postos a disponimentu dae sos comunes. Sos progetos sunt destinados a sos pitzinnos e pitzocos de iscola e s’ant a fàghere dae sa segunda metade de su mese de cabudanni finas a sa prima metade de su mese de santugaine.

(M.G.S.)