Comente difèndere sos telefoneddos dae sos piratas informàticos

A dies de oe, a intro de sos telefoneddos bi tenimus una parte de sa vida nostra: “craes” pro intrare a sos social network o a su contu currente, fotografias, vìdeos, documentos importantes… Si esserent intrados in manos de unu pirata, su dannu econòmicu e afetivu diat èssere mannu meda.

Sos espertos sunt narende dae paritzos annos de istare atentos a su cumportamentu chi si tenent, e in manera particulare dant sos cussìgios chi ponimus in fatu:

1) Istare atentos a su chi s’iscàrrigat dae Internet

Sos atacos de sos hacker punnant a nche furare credentziales e informatziones sensìbiles, ma finas fotografias e vìdeos chi podent impreare pro ricatare su mere de su telèfono.

Tocat a istare atentos a sas aplicatziones chi s’iscàrrigant, ca cussas farsas a bortas sunt totunas-totunas a sas originales e, iscarrighende·las in su telèfono, calicunu si podet apropiare de sos datos personales nostros.

2) Istare atentos a in ue si “clicat”

A bortas podent imbàtere messàgios in ue b’at cullegamentos a pàginas (o aplicatziones) chi installant programmas dannàrgios pro su telèfono o chi si nche furant sos datos. Tocat a dare atentu a in ue semus intrende e a ite semus incarchende.

3) Fàghere s’autenticatzione dòpia e istare atentos cando installamus sas aplicatziones

Su sistema de autenticatzione dòpia est prus seguru, siat pro su contu currente siat pro sos social. In prus, tocat a istare atentos a no iscarrigare aplicatziones dae sitos chi non sunt ufitziales e controllados. A bortas, pro fàghere in presse, non damus atentu a su chi semus abilitende e est pròpiu custa s’arma impreada dae sos piratas informàticos pro nos collionare.

4) Istare atentos a comente nos cullegamus a Internet

Wi-Fi e bluetooth sunt pagu seguros, tocat a dare atentu a comente s’impreat su bluetooth e a sas retes Wi-Fi sena password.

Comente nos nd’abbigiamus, si semus istados hackerados? Unu de sos signales est chi sa bateria si finit prus in presse, ca sas aplicatziones “malas” e sos programmas-ispia traballant “in s’umbra”, sena nde dare signale. Cando si tenet custa duda, tocat a provare a identificare s’aplicatzione chi at fatu su dannu e, si b’at istadu fura de identidade, tocat a cambiare totu sas craes de intrada.

(GF.P.)