Emergèntzia ìdrica

A pustis chi sa Asl de Aristanis, in una nota de su 23 de austu, at comunicadu chi sos paràmetros bateriològicos in sa rete ìdrica non sunt cunformes e s’abba no est potàbile, su Comune de Bosa at fatu un’ordinàntzia chi racumandat a sa gente de no impreare s’abba pro coghinare e pro bufare.

Sa situatzione de sa diga de Monteleone, chi dat abba a Bosa e a sa Pianalza, est crìtica: su livellu s’est abacadu ca est dae ora sena pròere e sos livellos bateriològicos, comente est normale in custas situatziones, sunt prus artos de su sòlitu.

Pro custa resone s’abba si podet impreare ebbia pro usos domèsticos e pro igiene personale, ma non pro bufare o coghinare.

Custa situatzione interessat totu sos comunes servidos dae su potabilizadore de Monteleone, e in particulare Bosa, Macumere, Montresta e Magumadas.

Sa ASL at pedidu a Abbanoa de garantire unu puntu de prelievu pro chi sa gente potzat otènnere abba bona pro bufare e pro coghinare.

S’ordinàntzia abarrat vàlida finas chi sa Asl no at a dare comunicatzione de sa fine de s’emergèntzia.

(GF.P.)