Festa de Regnos Altos – Unu documentàriu de su 1989

Dae sos archìvios de sa Libreria Digitale de Sardigna publicamus unu documentàriu bellu fatu dae s’Isre (Istituto Superiore Regionale Etnografico) in su 1989, pro registrare sa preparatzione e sa festa de Nostra Signora de sos Regnos Altos in Bosa.

Autores e registas sunt Ignazio Figus e Paolo Piquereddu.

Sas ripresas sunt fatas su bèsperu e sa die de sa festa. Si podent abbaidare (cun àudiu originale curadu dae Virgilio Piras) sas carreras de sa Costa mudadas a festa, cun sos altaritos prontos a saludare sa màgine chi nd’at a calare a su sero in protzessione dae su casteddu.

Sa gente acumpàngiat a Nostra Signora preghende cun devotzione, finas a imbàtere a sa Catedrale in ue s’incràs s’at a fàghere sa missa.

A su sero, a pustis de sa missa, Nostra Signora torrat a mòvere a cara a sa crèsia de su casteddu, in ue sa màgine est ospitada totu s’annu.

Pro abbaidare su documentàriu si podet incarcare in su link chi sighit:

https://www.sardegnadigitallibrary.it/index.php?xsl=2436&s=17&v=9&c=4460&id=43

(GF.P.)