Imparamus a nos difèndere dae su “virus” de sas NOVAS FARSAS

In custos ùrtimos annos semus chirchende de nos preservare dae situatziones chi podent pònnere in perìgulu sa salude nostra e sa vida matessi. A dies de oe, sigomente semus totu tecnològicos e pro onni cosa faghimus riferimentu a Internet, “su mastru mannu”, arriscamus de nche rùere in carchi trampa perigulosa. Tocat de dare atentu mannu ca non totu su chi b’est in Internet currispondet a sa veridade. Sa tecnologia est de importu mannu, si est impreada bene, ca cunsentit de fàghere cosas meda dae domo e de pòdere istare a faca mancari istende a tesu! Però b’est fintzas su perìgulu de nche rùere in carchi trampa, de èssere vìtimas de un’àteru “virus” chi est cussu chi, cun faeddos modernos, si narat “fake news”, est a nàrrere sas novas farsas. A totus nos est capitadu de lèghere, e carchi borta mandare a àtere, novas chi nos pariant de importu ma, a dolu mannu, non fiat gasi! Duncas tocat de dare atentzione a su chi si leget e in antis de difùndere est semper mègius de èssere seguros chi siant cosas sèrias iscritas dae espertos de su tema chi tratant. Tocat bìere dae in ue benit sa nova e chie l’at iscrita; de abbaidare fintzas su tipu de iscritura, sos tìtulos tropu ispantosos, sas fotografias montadas a arte o sas novas manipuladas e, a bortas, imbentadas de su totu. Tocat de istare atentos a non difùndere novas farsas ca custu gènerat timòria e cun sa timòria est prus fàtzile a controllare e a manipulare sa gente. Duncas, sena intentziones malas, ma cun sa presse de chèrrere èssere sos primos a dare sa nova, incarcamus e difundimus sena bi pensare e gasi nois puru nche intramus in una “cadena de Santu Antoni” chi non finit mai e chi podet èssere perigulosa meda.

(M.G.S.)