Libreddos didàticos pro pitzinnos minores

In su progetu de s’annu coladu, totu sos Comunes e sas iscolas de su territòriu ant retzidu sos libreddos aprontados cun su dinari de sa lege 482/1999 (art. 9 e 15) e de sa lege regionale 6/2012 (art. 2, comma 13) pro s’annualidade 2018.

Sos libreddos fiant tres, pensados pro edades diferentes: sos prus piticos podent colorare s’album “Ite colore est?“; pro sas primas tres classes elementares b’at unu cartolàriu de colorare rispetende sos inditos numèricos; pro sa 4° e sa 5° elementare b’at unu manualeddu chi aunit sa matemàtica a s’arte de sos colores. Paris cun sos libros sos pitzinnos ant retzidu finas un’iscatuleddu de pastellos a chera.

Su donu est istadu fatu finas a sos òspites de sas residèntzias pro betzos e malàidos, pro los fàghere ispassiare in sos meses de inserru causadu dae su Covid-19.

Sos libreddos, aprontados dae sas operadoras Gianfranca Piras e Maria Giovanna Serchisu, sunt curados dae s’assòtziu culturale L’Altra Cultura de Aristanis. Sa gràfica est de Badabò de Enrica Fara.

Chie tenet praghere de los bìere in versione “sfogliabile” si podet cullegare a sos link chi sighint, e cherende si podet finas iscarrigare su pdf:

Abbàida Ite colore est? (iscàrriga·lu dae inoghe)

Abbàida Sa matemàtica pintada (iscàrriga·lu dae inoghe)

Abbàida Coloramus cun sos nùmeros (iscàrriga·lu dae inoghe)

(GF.P.)