Sa “Callentura de su Nilu” (West Nile disease) – Sa ASL de Aristanis cussìgiat prudèntzia

Sa ASL est dende inditos pro chircare de parare fronte a sa difusione de sa West Nile Disease, mègius connota comente “Callentura de su Nilu”, a pustis chi in Aristanis un’òmine est istadu ricoveradu in s’ispidale pro neghe de cussa maladia.

Sunt afortigados sos controllos finas in sos animales (màssimu caddos e pugiones), ca su virus passat a s’òmine cando lu pìculat una tzìntzula chi in antis at piculadu un’animale malàidu.

Sos Entes cumpetentes in matèria de sanidade pùblica, emergèntzias sanitàrias e tutela ambientale sunt invitados a informare sa gente pro chi collàboret cun sas autoridades ponende in campu totu sas atziones ùtiles a minimare su perìgulu de infetzione.

In manera particulare tocat a bonificare sos logos pùblicos e privados in ue bi podet àere abba apojada chi permitit sa crèschida de sos bermes de tzìntzula.

Tocat a mantènnere netos ortos e giardinos e a mantènnere assutos totu cussos logos in ue s’abba proja si podet apojare (bidones, botos, suta-vasos etc.), ca bi podent nàschere sos bermes de sa tzìntzula. Sos materiales chi non si nche podent acòllere a logu frantu tocat a los ammuntare cun telos, pro chi s’abba no agatet logu de fàghere poju.

In logos in ue b’apat gente meda o in ue b’apat gente chi est prus sugeta a s’ismalaidare (ispidales, istruturas protetas, tzentros pro betzos, etc.) si podet pensare finas de bi meigare, e gasi puru cando b’apat eventos chi b’andat gente meda (festas, fieras o sagras fatas a iscurigantinu o a de note).

Si cussigiat a sa gente de si pònnere roba in colore craru pro non si fàghere pùnghere, e a ammuntare bene su carenadu cun camisas a màniga longa, cartzones o gunneddas longas, caltzas.

Sa Provìntzia, a pustis de una signalatzione de su cussigeri regionale Emanuele Cera (Forza Italia) chi aiat pedidu interventos contra de sos bobboeddos chi faghent dannu, at dadu a ischire chi sos interventos contra su berme de tzìntzula si faghent a manera regulare totu s’annu. Tocat de nàrrere, però, chi sa Provìntzia podet garantire su controllu de sos logos pùblicos, ma bortas meda sos focolajos nd’essint dae sos àmbitos privados e pro custa resone tocat a tènnere unu cumportamentu adeguadu pro chi in sos giardinos de sas domos non si bi forment pojos de abba.

Fiat dae su 2012 chi non si verificaiant casos de West Nile desease in Sardigna. Dae Aristanis e dae àteras biddas de sa provìntzia sunt imbàtidos avisos chi narant chi ocannu nch’at prus tzìntzula chi no in sos annos colados.

(GF.P.)