“Sardigna isbandonada” festat sos 10 annos cun un’atopu in Bosa

“Sardegna abbandonata”, progetu nàschidu in su 2012 dae un’initziativa de s’autore aristanesu Martino Pinna, in cabudanni festat sos 10 annos e nde dat unu rendicontu in un’eventu intituladu “Geografia alternativa di un’isola. Sui sentieri di Sardegna abbandonata” chi s’at a fàghere in Bosa. S’apuntamentu est pro sàbadu 3 de cabudanni in sa Casa del Popolo a sas 7 de sero (h 19,00).

S’eventu, fatu pro festare sos 10 annos de su progetu, at a dare sa possibilidade de faeddare cun su pùblicu de sos logos isbandonados e de cussa “geografia alternativa” chi su progetu sighit a fraigare sighende su ditzu chi “in mesu de su nudda b’at semper carchi cosa”.

B’at a àere finas una mustra de acuarellos de su pintore Gianluigi Concas chi in sos cuadros suos rapresentat sos logos isbandonados de Sardigna.

Su situ de riferimentu de custu progetu est https://www.sardegnaabbandonata.it/; in custos annos si sunt fatos tres documentàrios e paritzas mustras, cunferèntzias, mìgias de fotografias e chentinas de artìculos.

In su 2023 at a essire unu libro illustradu chi faeddat de su caminu mineràriu de Santa Bàrbara, 500 chilòmetros in su Sulcis Igresiente in mesu de minieras isbandonadas e de montes.

(GF.P.)