Su Museu de su Binu in Magumadas

Su Museu de su Binu de Magumadas s’agatat a faca a sa Crèsia Parrochiale de Santu Giuanne, in una domo antiga, de su 1800, chi fiat sa domo parrochiale. Bella meda sa domo, bene sistemada, e bellu totu su chi b’est a intro, totu sos atretzos de s’arte de fàghere su binu, comintzende dae sos traballos de sa bìngia finas a imbàtere a sa binnenna e a sa produtzione de su binu ispetziale chi in custa zona si faghet. Ammirende custos istrepos paret de torrare in dae segus in su tempus, a dies coladas ma impressas in sa memòria de sos mannos e resas presentes a sos minores. In prus b’at pannellos descritivos in ue sunt ispiegadas bene totu sas fases de produtzione de s’àghina e de su binu. Sos aposentos de su Museu sunt adatos puru pro ospitare mustras, pro fàghere presentadas de libros o cale si siat àtera manifestatzione culturale. In su Museu b’est puru s’ortu (in ue bi sunt sos restos de su nuraghe “Oladolzu”) dae in ue si podet ammirare unu panorama de incantu: si bidet su mare, sa badde, sas bìngias de unu territòriu de rara bellesa.

Su Comune de Magumadas, paris cun sos pitzocos de su servìtziu tzivile, torrat a abèrrere su museu a su pùblicu. Dae sa prima die de austu 2022 s’oràriu de abertura est: su LUNIS, su MÈRCURIS, sa CHENÀBURA, h 10,30 – 12,30. Pro intrare non si pagat nudda.

Pro informatziones : tel. 0785 35323

(M.G.S.)