Su Museu “MUDAS” de Frussio

In su 2015, in Frussio, ant abertu unu museu dedicadu a s’isciareu. MUDAS, su Museu difusu de s’isciareu, est in sa ex Domo Comunale, in carrera Nazionale. Su museu est nàschidu pro abbalorare s’arte antiga e de importu mannu de cosire isciareu (pro sèculos elementu de fundamentu pro s’economia de sa bidda) e pro dare sa possibilidade de ammirare e apretziare sas prendas chi essint a pìgiu dae sas manos de sas artesanas frussiesas. In antigu, ogni pobidda de domo depiat tènnere su corredo de corbes e canisteddas, de tantas mesuras, pro cando si faghiat su pane in domo. Pro custu beniant dae logos meda de Sardigna a las comporare in Frussio. In custos ùrtimos annos, in prus de sos ogetos traditzionales, si sunt faghende cosas innovativas chi sunt andende foras dae sa Sardigna, in su mercadu internatzionale. Su Museu MUDAS est intesu comente “museu difusu”, est a nàrrere chi sa sede est su puntu de partèntzia pro pòdere visitare sos laboratòrios presentes in intro de sa bidda. Duncas sa bidda matessi est su museu.

Pro informatziones:

Telèfono: 339 231 6862

Posta eletrònica: museoflussio@gmail.com

(M.G.S.)